漢堡史特加換完帥鬥大

猪拉多纳

今晚德甲漢堡主場對史特加，兩支老牌球會今季行緊同一條路，季初令人失望後換帥即反彈，如今喺兩位新帥帶領下氣勢如虹，加上雙方都攻強守弱，今仗預期係入球騷，黑柴捧大盤。

（有線61及64台周日晚9時30分直播）

講到壯士斷臂，史特加比漢堡早，八月底佢哋已經睇到庸帥拉巴迪亞教唔掂，索性提升年僅40歲嘅青年軍教頭舒尼達接手，點知球隊喺呢位冇德甲經驗嘅少帥手上踢出彩虹，球隊喺佢上任後聯賽五戰三勝兩和未輸過，當中仲包括大炒賀芬咸6比2同布倫瑞克4比0。

除咗主力射手伊比斯域持續大勇外，季初不受重用兼冇貨交嘅伊巴謙查奧爾同夏歷亦告翻生，球隊陣中仲打起咗今季第三輪至受重用嘅羅馬尼亞國腳阿歷山度馬辛，呢位中場大腦喺六輪聯賽已經交出三個入球同五次助攻，係球隊動力嘅泉源，但球隊防線唔算穩陣，作客遇上當起嘅漢堡料難保清白之身。
雲帥主場「地標戰」實搶攻

漢堡換帥較遲，但新帥雲馬維克除咗有帶領荷蘭殺入世界盃決賽嘅資歷外，佢亦係球隊靈魂雲達華治向會方大力推薦，呢對師徒合作，亦令雲達華治更加賣力。

雲帥上任後首仗即作客逼和法蘭克福，上場更加作客大炒紐倫堡5比0，由哈化柏林借嚟嘅中鋒拉蘇加技驚四座，今仗係雲馬維克首度領軍喺主場出擊，當然會以進攻足球取悅球迷。兩軍目前都心雄到極，今仗入球又點會少。