砌盡博新班主好感 國米客W冇甩「拖」

猪拉多纳

正所謂新人事新作風，印尼富豪托希爾喺日前入主國際米蘭後，換帥換血消息傳遍天，「藍黑兵」教頭馬沙利同班球員為咗保住飯碗，今晚喺意甲作客防線殘破不堪嘅拖連奴，梗係要識得自動波砌盡求贏波，幫新老闆洗塵兼博好感，吼實1.98倍客勝。

（開賽時間：周一凌晨2:45）
拖連奴防線天殘地缺

富豪托希爾入股做大老闆後，盛傳會撤換教頭馬沙利，兼且心儀米高盧特立或者法蘭迪保亞接掌帥印，唔少球員更難逃冬季被大清洗嘅厄運。呢啲雖屬傳聞，可信性幾高冇人知，不過話晒新老細上場，醒目啲嘅都識點做啦！前鋒柏拉斯奧、中場高華錫、施列迪泰達等國腳級球星，國際賽過後全部健康歸隊，陣容齊整勝算頗高。

相反拖連奴進攻中場奧馬艾卡杜里受傷倦勤，組織攻勢大受影響之餘，防線領袖基歷克停賽，馬克斯莫域、保禾、古勒莫洛迪古斯幾件後衞全部養傷，後防肯定暴露唔少漏洞。雖然因為假波被罰停賽嘅箭頭保羅巴列圖同中場加茲終於復出，可惜兩人久疏戰陣，未必咁快搵得番比賽狀態，今場幫唔到幾多手。