恒大躁爆反轉首爾

猪拉多纳

陰招阻操練又老屈納比

亞冠盃王者戰首回合展開，南韓代表ＦＣ首爾先於主場迎戰中國班霸ＦＣ廣州（廣州恒大），首爾賽前出賤招阻住對手練波，韓媒仲寸廣州主帥納比係「一流名帥二流態度」，辣慶全軍將帥，恒大誓必要對手付出代價，佢哋喺淘汰賽保持全勝紀錄，今戰讓平半照捧上盤！

（now 670周六晚6時30分直播）

恒大本周四抵達首爾，當晚諗住夜操一課適應環境，殊不知首爾使陰招，只提供冇燈光球場，搞到班波一係摸黑操，一係唔操，納比最終選擇後者。納比話自己領軍30年以來從未試過呢種情況，面對對手無禮對待，呢位名帥淡定反擊：「佢哋可以放心喎，嚟到廣州我哋一定會以禮相待！」

南韓傳媒就斥納比大牌，指恒大改住五星級酒店，仲要求更改記招場地，以「一流名帥二流態度」嚟形容呢位世界級教頭，納比強調自己冇要求轉場，莫非係韓媒老屈？至於軍情方面，守將張琳芃已傷愈，大軍基本上齊腳，前線三大外援穆里奇、孔卡同艾傑臣拍住上，誓要出番啖氣！
ＦＣ首爾得丹恩奴域衝鋒

另一邊廂首爾前線靠晒黑山中鋒丹恩奴域攻堅，相比起恒大擁有三大頂級外援，進攻火力肯定唔及對手。自進入淘汰賽階段，恒大不分主、客六戰全勝，當中五場贏兩球或以上，霸氣十足，首爾仲唔識死激嬲佢哋班球員，肯定冇好下場！