綽力之城信得過

猪拉多纳

　　今日有兩項錦標賽上演，稱得上係大賽日，1場1200米精英碗，另1場係1600米沙田錦標。但凡大賽日，潛規則係捧大馬房，但咁講未免太滑頭，大馬房有十個八個，範圍咁闊，點買呀？阿棟自己則覺得，今日摩蔡兩廐應該會連場出擊。

　　第五場四班1400米。「珍珠有利」成日在1200米追來追去只能夠跑得接近，就算上次個第二都輸兩個半馬位，唔係出色，可能阿苗左諗右諗，認為加程係突破嘅辦法之一，有冇可能帶來壞影響，真係好難講，計正今仗對手唔係太強，如果匹馬有長力，坐位望贏。

　　第六場三班1200米。「大行情」轉去阿苗馬房，一出即贏，上季喺阿威度，其實已養得好好，只係當時隻馬未成熟，對新環境感到陌生，先至交唔出成績。

　　大行情q檔如虎添翼

　　「大行情」依家開了竅，回到三班，重新嚟過，可能好多虛分在手未定，他日殺上二班又唔定，總言之，實力必須重新估計。呢類跑法嘅馬，排到1檔，老土啲講，可謂如虎添翼，有力再勝。

　　第七場二級賽1200米。咪睇「綽力之城」只係匹體重一千磅嘅馬，其實好鬼襟搏，已經跑咗兩季，十幾場得兩場冇位置，準到無倫！

　　「綽力之城」呢啲馬係熱門賭客恩物，因為唔怕你賠率熱一熱，最怕你縮番條槓，輸到賭客渣都冇，而佢就唔同，場場都搏命，鬥志真係好到不得了，唔信佢，仲信邊隻。(陳華棟 資深評馬人)