基達菲弗爆 畢爾包送死

猪拉多纳

今晚開盤賽事唔多，其中西甲獨腳戲基達菲主場迎戰畢爾包最為好路。基軍近四場聯賽全部贏晒，以阿祖安哥倫加同柏度李安為首嘅攻擊線弗到爆燈，面對作客腳軟嘅畢爾包可乘勝追擊，有得受讓不容錯過。

（周二清晨5時開賽）

季初出閘脫腳嘅基達菲，喺核心柏度李安帶動下全面復甦，並且激活咗前線拍檔阿祖安哥倫加，士哥停不了，因此基軍近四聯賽全部報捷絕不出奇，況且後備席仲有秘密武器馬利卡候命，呢位羅馬尼亞前鋒近況不俗，變陣嗰陣唔愁冇兵用。

畢爾包一向主強客弱，之前三仗作客輸晒，真係未踢已腳仔軟，睇番佢哋近六次去到基軍地頭未嘗一勝，今仗邊有本錢讓波呀？基達菲嘅讓球主勝捧得過。
多德勒支教訓阿積士青年

至於荷乙阿積士青年隊主場硬撼多德勒支，前者近四仗輸晒曳到冇朋友，相反一哥多德勒支上仗喺踢少個兼落後嘅劣勢下反勝安曼，成功打場翻身仗，有力擊潰士氣低迷嘅阿積士青年隊。

最後德乙波琴主場對凱沙羅頓，波琴聯賽連盃賽已錄得五連敗，最慘係入得兩粒咁大把，面對志切爭升班嘅前列分子凱沙羅頓，有地利都信唔過，直取客勝。