巴塞半場大酬賓

猪拉多纳

美斯恨入波速戰速決

今晚西甲獨腳戲上演加泰隆尼亞打吡，衞冕嘅巴塞隆拿主場迎戰愛斯賓奴，由於西甲啱啱先開完快車，巴塞主帥馬天奴巧施輪換大法，令球員得到充分休息，加上射手美斯求破入球荒心切，預計「地上最強」會盡早入多幾粒鎖定勝局，半場大有買趁早。

（now 632周六凌晨4時直播）

季初被嘲笑為鄉下佬嘅主帥馬天奴，開季16仗正式比賽取得12勝4和，成為巴塞史上首位帶隊頭16場未輸過嘅新帥，證明呢位阿根廷籍教頭唔係呃飯食。為保持球員嘅體能及飢渴感，佢竟然夠膽換走球王美斯，上仗對切爾達特登收起碧基、沙維、尼馬及恩尼斯達等主力，前三人更係一分鐘都冇踢過，可以話為今場對愛斯賓奴養精蓄銳。
逃稅案甩身 專心砌愛奴

如果話美斯入波係平常事，咁佢近3場聯賽冇士哥就變成大新聞，尤其係上仗10次埋門都食白果，認真失威。早前美斯捲入逃稅案，但據西班牙《阿斯報》披露，經過美斯出庭應訊及補交欠稅後，稅務官員已確認美斯對逃稅事件全不知情，換言之即係「無罪釋放」，可以專心比賽。愛斯賓奴近3場作客全部輸晒，巴塞為留力應付下周又再展開嘅歐聯，一開波必定搶得就搶，實行晨早鎖定勝局，上半場入兩三粒唔出奇，既然半場主勝冇肉食，不妨轉玩有1.7倍嘅半場大。