FC悉尼海鮮波 光輝死火捱細界

猪拉多纳

前晚「萬聖節」適逢我哋有線20周年台慶，仲攞埋個免費電視牌，公司特登擺咗百幾圍賀一賀佢，全台上下齊齊開心番晚。當晚唔止有得食，最開心梗係小妹同體育台一班兄弟姊妹有份參與嘅朗誦表演攞咗全場冠軍啦！

有線「雙十年華」，「澳職」都邁向十周年喇，過往雖然有黃金海岸聯、北昆士柏流浪呢啲曇花一現球隊，但隨住聯賽發展愈嚟愈健康，十支參賽隊伍亦一樣，入座人數仲一季多過一季添，相信澳職呢個聯賽會愈嚟愈吸引，比賽亦愈來愈刺激。
光輝臨門一腳曳到暈

今日下晝球彩台繼續有澳職雙料娛樂，頭場珀斯光輝同FC悉尼都係澳職嘅元老球會a，但睇咗開咧三輪賽事，呢兩隊表現都只係中規中矩。光輝依家問題係攻力太弱，雖然上星期擊敗墨爾本雄心，但佢哋13次埋門只得幾次中目標，最後更只得占美麥卡倫一個入球。屢射唔中同光輝王牌射手史美斯因傷缺陣絕對有直接關係，雖然據報呢位仁兄今日能夠復出，但相信狀態尚待提升。

FC悉尼季前大肆擴軍，小妹都以為佢哋會有一番新局面，但睇番呢幾場表現，都係踢得好「海鮮」，同上季分別唔大。例如上星期對西悉尼流浪者踢到亂晒節奏，真係唔夠砌，教頭法連拿要再諗諗計調整隊波喇！小妹估計呢場波入球唔多，好在尾場重有場紐卡素噴射機對中岸水手直播，大家記得要睇足兩場呀！
妹頭推介

珀斯光輝 對 FC悉尼 入球細