魔童客戰醒曼聯「W」致「富」

猪拉多纳

曼聯「魔氣」重現肆虐倫敦！近排重拾佳態嘅紅魔今晚喺英超作客富咸，恃住近11次出訪倫敦都保持不敗嘅氣勢，今晚睇怕唔難全取3分。最緊要係紅魔雙箭頭朗尼同尹佩斯近排喺客場演出特別醒神，入球停不了，今場夠狠追2.38倍「讓客」都冇問題！

（now621台周六晚11:00直播）
富咸主場都惡唔出樣

季初表現令人失望嘅紅魔，隨住球員開始適應新帥莫耶斯領軍風格，戰績終見回升，近6場打出4勝2和不敗佳績，上周贏史篤城更加係兩度落後下反勝，昔日嘅永不放棄精神終重現奧脫福。講到底，曼聯班底都係爭標分子，目前僅以9戰得14分排第8位，當然心急搶分追趕榜首阿仙奴，落到場自然去到盡，事實艾拉賽前仲話要爭取連贏10場添。

紅魔周中聯賽盃半力出擊，雙箭頭朗尼同尹佩斯今場會回歸正選，唔係嚇你，原來「魔童」近15場聯賽作客入波加助攻就炮製咗11個士哥，尹佩斯近7場英超客戰亦入咗6球，有呢對孖寶壓陣紅魔入波點會少！

主隊富咸今季主場3戰只得1勝，有地利都惡唔出樣，加上近5場聯賽對曼聯又輸晒，周中聯賽盃入2球嘅前鋒洛達列加亦有傷在身，同防線主力軒治蘭特一齊休戰，點睇都唔似爆得出囉！