費倫攞「A」送阿里基上路

猪拉多纳

AC米蘭今季一次又一次令球迷失望，唔單止Fans冇癮，老闆貝魯斯干尼都躁爆，今晚佢哋喺主場恭候近況唔錯嘅費倫天拿，橫睇掂睇都唔似會攞到「紫百合」着數，仲讓平半當然信唔過，一於撐費倫2.22倍下盤，送AC教練阿里基上路。

（TVB301周日凌晨3:45直播）
紅黑兵團第二差開季

「紅黑兵團」10輪聯賽過後贏得3場，錄得意甲改行3分制之後嘅球會第二差開季，上場波畀拉素逼和1:1之後，《米蘭體育報》話貝魯斯干尼已經躁咗，仲下令如果今晚對費倫同下周四凌晨造訪巴塞場歐聯冇貨交，咁阿里基就可以執定包袱喎！

阿里基要保住飯碗，肯定想搵「紫百合」祭旗吊命，奈何阿根廷悍將馬迪亞斯施維斯達小腿受傷要抖10日，中堅麥薩斯又要停賽，對住今季場均有兩球進帳嘅費倫真係有隱憂。況且「紫百合」近4場波贏咗3場，上仗如果唔係球證發雞盲冇判12碼畀費倫，佢哋根本唔使輸畀拿玻里1:2，家陣班波谷埋成肚火，就算後衞古達度上訴失敗坐波監，肯定搵「紅黑兵團」出氣啦！