拜仁玩花臣大爆發

猪拉多纳

贏到開巷哥帥未收貨

歐聯D組進攻王拜仁慕尼黑今輪作客失波王柏辛域陀尼亞，拜仁追平德甲史上最長三十六場不敗紀錄，但教頭哥迪奧拿仍然意見多多，近日仲捉住主將「小豬」舒韋恩史迪加照肺超過十分鐘，又話要改戰術，煩到嘔！為咗令哥帥收聲，拜仁將士必須改善表現，今戰鬥弱旅係大勝良機，入球大細中位數改成3.5球照捧大盤！

（有線63台周三凌晨3時45分直播）

拜仁連續三場聯賽反勝對手，展現強橫後勁，但主帥哥迪奧拿唔收貨，據德國傳媒《圖片報》爆料，近日大軍練波時，哥帥捉住舒韋恩史迪加講咗超過十分鐘，仲指住個頭話「你係球隊核心球員，要用腦踢波啊！」，「小豬」畀佢煩到木口木面，相當冇癮。哥迪奧拿仲高調話要調整戰術：「係時候要作出改變，主要係郁吓啲戰術，要不斷提升先可以贏冠軍！」
柏辛域陀尼亞防線穿窿

拜仁仍有箭頭比沙路、快翼梳頓沙基利及堤亞高艾簡達拿等主力養傷，但佢哋人腳超強，少咗件影響都唔大。拜仁只要今場贏波，同組嘅莫斯科中央陸軍又贏唔到曼城，到時拜仁就可提前晉級，呢點會為球隊帶來額外動力。呢支德甲班霸分組賽三戰轟入十一粒，柏辛域陀尼亞就失咗十一粒，包括上輪作客拜仁淨吞五蛋，兩軍差距實在太大。另外，拜仁高層漢尼斯瞞稅事作仲有手尾跟，明年3月要出庭聆訊，球更需大勝一場沖喜。