車仔大騷冧寸王

猪拉多纳

聯賽輸得醜 洩憤史浩克

寸王發火，非同小可！車路士上場輸得醜怪，寸爆主帥莫連奴躁爆，大軍喺歐聯E組主場大戰史浩克04，莫帥講明會大幅度變陣，上仗夢遊球場嘅中堅大衞雷斯勢被開刀，一眾球員唔敢再辣慶阿頭，唔搏唔得，有力再炒史浩克，捧入球大！

（有線62及202台周四凌晨3時45分直播）

莫連奴對外寸寸貢，對內不嬲錫住班兵，好少公開批評麾下將士，但車仔上仗英超作客對紐卡素踢得極曳，佢都忍唔住發火，今仗賽前表明會變陣：「上場對紐卡素踢成咁，我都唔知球隊最佳正選人腳係點喇！我唔會換晒11個球員，但一定會求變囉。」

車路士中堅大衞雷斯上場孭晒鑊，盛傳有隊友喺更衣室插佢比賽態度曳，莫連奴本來都唔多鍾意呢個巴西守將，睇個勢佢今場都係冇得留低。箭頭費蘭度托利斯有傷不能上陣，預計伊度奧會取代佢攻堅，相信呢位喀麥隆老將為氹番莫帥，一定會盡力數胡。
史軍殘陣征英捱打

另一邊廂史浩克04就面對嚴重傷兵問題，現時有多達8件十字軍，當中包括箭頭亨特拉爾、法芬、中場馬高賀查及守將柏柏杜普路斯等主力，戰鬥力起碼打個七折！史浩克上次主場對車路士都吞三蛋，踢落完全唔同級數，特別係埋門把握力差距真係太大，今次去到史丹福橋球場形勢更差，相信都係捱打，只能寄望有料中場奇雲保定發功爭取士哥攞個安慰獎。車仔大勝機會高，大盤有1.62倍值得一試！