費格遜嘅Winning 11

猪拉多纳

見到曼聯暫時喺英超排第八，我估好多球迷都同我一樣掛住費格遜。無可否認，冇費Sir嘅曼聯實力好似即時跌咗一班。費格遜喺曼聯執教嘅26年半入面捧盃捧到手軟，佢揀兵選將嘅能力絕對係成功嘅因素之一。經費Sir精心提點教授後，一班球星除咗個個打百二分波外，仲好忠心咁為佢賣命比賽。

費Sir自己都講，佢教過嘅球星有如天上繁星，要佢揀十一個出嚟組成一個最佳陣容根本係一個幸福嘅煩惱，所以佢只係提咗部分球星嘅名出嚟，但呢幾粒星絕對係曼聯歷史中嘅星中之星，當中包括簡東拿、C朗、史高斯、傑斯、艾雲等，今晚《球分》會再同大家講多啲關於曼聯嘅有趣資料！

（now 101周五晚10時30分直播）
傑斯one and the only one

由於我波齡尚淺，咁多位球星中最有印象嘅都係傑斯。一個球員由英超成立至今每季都有入球，絕對係極高嘅難度，傑斯係「one and the only one」 。人到四十仍然場場交足功課，我認為佢絕對係費Sir最佳十一人中嘅最佳。

講咗咁耐曼聯，你哋可能會以為我變節支持曼聯？當然唔會啦！雖然我欣賞費Sir，但都唔會改變我撐阿仙奴嘅立場。今個星期日晚曼聯對阿仙奴我當然睇好阿仙奴，上星期「兵工廠」連利物浦都贏到，今次一樣會擊敗曼聯。