巴塞贏兩粒Easy執

猪拉多纳

尼馬「親子砵」射爆貝迪斯

今晚西甲尾場，衞冕嘅巴塞隆拿作客貝迪斯，前者嘅「新比利」尼馬今仗會着住特製波砵應戰，對砵繡上佢同囝囝嘅名添！至於隊長佩奧爾女友賽前大晒幸福大肚相，溫情滿瀉，加上貝迪斯兩線作戰疲於奔命，巴塞可趁機贏番「剋星」一鋪，直取讓球客勝。

(now 632周一凌晨4時直播)
佩奧嫂大肚撐愛郎

巴塞剛喺歐聯擊敗AC提早出線，王牌射手美斯又打破入球荒，好拍檔尼馬自國家打吡攞晒彩後，人氣急升，贊助商NIKE特登為佢推出一款以黃、藍色為主嘅新波砵，唔單止喺右腳砵背繡上尼馬名字嘅簡寫NJR，左腳砵背更繡咗佢囝囝Davi Lucca嘅名，有囝囝「拍住」上陣，必定分外醒神。

至於隊長佩奧爾嘅模特兒女友雲妮莎羅倫素，日前喺雜誌封面大晒大肚相，除咗腹大便便，懷孕已經6個月嘅佩奧嫂，其S身形都keep得唔錯，搔首弄姿兼四萬笑容依然好索，阿嫂仲宣稱要同愛郎共度一生，真係Sweet到爆，佩老大聽到，今仗一定加多兩錢肉緊。
分心歐霸疲於奔命

對手貝迪斯兵源緊絀，又太過着眼於歐霸，球員疲於奔命，打嚟打去都嗰十幾個，唔攰就假，搞到聯賽成績下滑，該隊已經個幾月未喺聯賽贏過，依家跌到落尾二。

儘管貝迪斯近6次喺主場對巴塞僅輸1次，堪稱巴塞剋星，但此一時彼一時，如今大軍有沙維托利斯、古勒莫沙拉、魯賓卡斯度、柏基斯等傷兵，想谷都谷唔起，相反「地上最強」重拾佳態，相信要喺貝迪斯地頭贏兩粒冇難度，讓球客勝照捧可也。