高雲地利脫貧有福氣

猪拉多纳

今晚英甲獨腳戲巴拉福特主場對高雲地利，巴拉福特近況頹到爆，反觀高雲地利一片好景，場內成績直線上升，場外就財源滾滾來，平手盤值捧客隊。

（TVB301周日晚11時30分直播）

巴拉福特近期狀態下滑，近六場不勝不特止，最弊係近兩次喺主場出戰都要輸波，今場不宜高估。而且本身有傷嘅主力中堅麥艾度兩日前代表北愛爾蘭飛去土耳其踢國際賽，雖然最尾冇出場，但佢咁樣飛嚟飛去對其傷勢百害而無一利，強如球王美斯受傷都要抖喇！有見及此，巴拉福特今場或會畀麥艾度抖吓，球隊冇埋佢防線更係雪上加霜。
場內場外順到冇朋友

反觀高雲地利近八仗不敗，當中贏咗六場，好大原因係同球會營運情況得到改善有關，球員見球會營運狀況好，落場踢都會出多啲力！高雲地利今季因財務問題被扣十分，搞到依家排喺第十一位，但球會決心改善財政，近排超多搞作，希望搵多啲真銀，繼上個月出新波衫後，近日更有全新旗艦店開張，店內除咗有商品同門票銷售外，更提供一個場地舉辦社區活動，真係有諗頭。高雲地利場內場外都Run得咁順，一於續捧﹗