3大「福」星照住 高雲地利平手盤抵捧

猪拉多纳

今晚英甲獨腳戲，巴拉福特迎戰高雲地利，兩軍狀態各走極端，巴拉福特正值低潮，搞到教頭菲爾柏堅遜要走出嚟道歉，相反高雲地利勢如破竹，一對箭頭弗到漏，教頭派士利仲攞埋每月最佳領隊添，3大福星「高」照，足智彩開平手盤，梗係捧1.83倍嘅高雲地利啦！

（TVB301周日晚11:30直播）
巴拉福特跌Watt領隊道歉

巴拉福特自10月中被燦美爾打窒道氣後，表現隨即「急瀉」，近5場聯賽拎得嗰2分不特止，日前英總更淨吞洛達咸3蛋出局，搞到教頭菲爾柏堅遜喺賽後記招要向擁躉耍冧。隊長加利鍾斯今仗賽前信誓旦旦咁話：「喺電視直播鏡頭面前，係我哋糾正錯誤嘅好機會。」思想係就係夠正面，但可惜中堅安祖戴維斯繼續長抖，麥艾度又被北愛爾蘭國家隊徵召，防線唔齊章，前線又啞火，巴拉福特根本未係時候反彈。

高雲地利雖因財政問題今季被扣10分起步，好在球員演出依然神勇，上月連同英聯錦及英甲6場波入面，除咗作客賽和奧連特同狼隊呢兩支英甲前列分子，其餘4場全部贏晒，教頭派士利當選10月英甲最佳領隊實至名歸。除咗派士利領導有方，雙箭頭李安奇勒及哥林威爾遜亦撻行副偈，近6戰夾埋攻入8球，今晚要撕破巴拉福特殘爆防線，真係話都冇咁易！