回吐完！羅馬係時候再獲利

猪拉多纳

今輪意甲壓軸戰，羅馬主場對卡利亞里，羅馬自從打破意甲最佳開季成績紀錄後，連續兩輪失分，似「獲利回吐」，好彩有個國際賽檔期畀球員調整心態及喘息，相信可重拾鬥志搏殺，加上前鋒謝雲奴復出，提升火力，必全力搶攻求反彈。卡利亞里作客三連敗，受讓都冇着數，直取羅馬讓球主勝。

（TVB 301周二凌晨3時45分直播）

羅馬創下意甲最佳開季成績紀錄後，球員心態有所鬆懈，但經過連續兩場和波係時候重新上路搶分。球隊近期入波數字下降，好大程度因為托迪及謝雲奴受傷缺陣，好消息係謝雲奴已痊愈，可隨時候命。羅馬今仗對弱隊，正係爭取大勝，重振軍心嘅好時機。
卡利亞里用阿丹把關更危

卡利亞里防線好曳，12場聯賽已失20球，平均每場失近兩球。會方早前簽下前皇馬門將阿丹救亡，但呢位西班牙球員以往喺「銀河艦隊」長居後備，早已雪到硬晒，而且自從9月被皇馬放棄後，一直冇踢過正式賽事，狀態肯定唔好，若然佢今場擔正，恐怕要由網入面執幾次波出來。