「復仇者聯盟」首輪輸波 今夜還拖

猪拉多纳

誓報拆招牌之恨 車仔搶W冇素講

歐聯分組賽進入關鍵性嘅第5輪，其中車路士、多蒙特同些路迪無獨有偶都喺9月19日嘅首輪落筆打三更，今夜終於等到機會遇番對方，3隊波組成「復仇者聯盟」，誓要將恥辱百倍奉還！E組車仔上次主場爆冷輸畀巴素利，慘被笑到面黃；身處死亡F組嘅多蒙特首循環不敵拿玻里，家陣被逼到再無退路；H組蘇超班霸些路迪上次作客AC米蘭頂到尾段先慘敗，非常陰功！正所謂仇人見面，分外眼紅，今輪呢個「復仇者聯盟」除咗要為面子而戰，仲要奪取出線黃金3分，戰意咁旺，一於撐晒佢哋W！

E組榜首車路士只攞多1分就可提前出線，但佢哋作客巴素利絕對唔會採取1分政策。事關巴素利首輸曾打爛車路士寸王莫連奴個主場招牌，因此「莫家軍」絕對唔會放過對手，今次下定決心復仇，以佢哋嘅實力同近況絕對有力反客為主，捧客W！

（有線62及202台周三凌晨3時45分直播）
作客攞1分即出線

車路士史丹福橋主場靚績向來令莫連奴引以為傲，大軍喺分組賽首戰對巴素利被捧成一面倒熱門，完半場前由奧斯卡杜斯山度士打破缺口，一切睇嚟盡在掌握之中，殊不知巴素利換邊後把握兩個反擊反勝，莫連奴主場金漆招牌被拆，定必好想報復，誓要喺巴素利主場整番場漂亮勝仗。

自首戰輸畀巴素利後，車路士喺歐聯打得超級認真，之後豪取3連勝，轟入10球兼保持不失，贏得最少嗰場都淨勝3球，車仔再添1分即可出線，但大軍實力超班，何需計埋啲婆乸數，遇上仇家巴素利更會認真搏殺。射手費蘭度托利斯同左閘A高傷愈可候命，主力齊晒咁滯，惡氣十足！
巴素利缺兩大主力

瑞士球會巴素利踢落唔曳，佢哋對上4次喺歐洲賽鬥英超球隊都能保持不敗，其中包括砌低名牌曼聯。不過，車仔已經錯過一次，今次自會提高警覺，同時作出針對性部署，巴素利冇咁易偷雞，大軍仲有守將沙法利及智利中場馬些路戴亞斯兩大主力養傷唔出得，睇怕主場一樣唔夠揪，係時候「還」畀車仔。