慕遜加柏「讓主」執到「堡」

猪拉多纳

德甲邊隊波主場最惡？相信十個有九個都會話係拜仁慕尼黑，不過直至上一輪為止，其實慕遜加柏先至係德甲「主場王」！德甲頭13輪賽事入面，得拜仁同慕遜加柏係主場全勝，但係踢少場嘅慕遜加柏無論入波定得失球差都更勝拜仁，今晚佢哋主場迎戰弱旅弗賴堡有望繼續大炒，「讓主」一定要撐！

（有線61、64、201及203周一凌晨0:30直播）
慕遜主場勁過拜仁

慕遜加柏今季6場主場聯賽贏晒，前列分子多蒙特、漢諾威同紐倫堡通通都要喺佢哋主場慘敗，慕遜加柏喺呢6場波足足入咗20球，平均每場入3球以上！球隊射手麥斯古斯賽前講明要爭奪明年歐聯參賽資格，士氣爆晒燈，想勒都勒唔住！

弗賴堡今季表現差勁，要兼顧歐霸盃更加令佢哋兩頭唔到岸。弗賴堡周中先至要飛去捷克踢歐霸盃，一返國就要作客慕遜加柏，最弊係佢哋仲有成堆傷兵，中場莊拿芬舒密特、賀夫拿同達列達都唔出得，咁嘅形勢邊頂得住慕遜加柏呀？
頂占筍盤：慕遜加柏（讓球主勝）