巴塞開殺戒手到「拿」來

猪拉多纳

丙組仔唔夠班聽炒

啱啱經歷咗4年嚟第3次兩連敗嘅巴塞，隨即畀唔少人質疑佢哋班波嘅能力。巴塞一眾球星見慣風浪，又點會咁易畀呢啲新聞影響，反而會激發起佢哋嘅鬥心。聽朝「地上最強」喺西班牙盃第4圈首回合作客丙組嘅卡達真拿，係時間大開殺戒一吐烏氣，巴塞讓2球，一於撐2.26倍「讓球客勝」。

（now632台周六清晨5:00直播）
佐迪艾巴復操可鬥卡達真拿

巴塞接連輸畀阿積士同畢爾包後，就傳出王朝沒落消息，不過呢支西甲勁旅未驚過。副會長巴杜美奧日前輕描淡寫指今季球隊表現唔差，估唔到會收到咁多批評，最後仲力撐話：「球隊好快會有改善，唔會咁就沒落！」就連中堅碧基都承諾會改善戰績，今次對住丙組仔仲唔把握機會大炒一場反底咩？

雖然射手美斯繼續抖，中場沙維、恩尼斯達未必上陣，巴塞陣中仍有翼鋒阿歷斯山齊士、尼馬，中場法比加斯等猛人，實力明顯高對手幾班。加上出擊左閘佐迪艾巴已經復操，話唔埋後備上陣建奇功。

近4場贏2場嘅卡達真拿，防守唔算穩陣，4場一共失4球，今仗面對火力超猛嘅巴塞相信幾難頂得住。陣中前鋒迪亞高同左閘塔倫天奴之前分別踢過貝迪斯同畢爾包，可惜其餘隊友級數有限，對住一心求勝嘅巴塞，睇怕都要由自己龍門執多幾次波出嚟喇！