曼聯多隱憂讓唔起侯城

猪拉多纳

衞冕英超嘅曼聯拆禮物日頭場作客侯城，侯城教頭布魯士屬「紅魔鬼」傳奇教頭費格遜弟子，睇住師傅欽點莫耶斯帶領曼聯難免會眼紅，實想落井下石踩多莫帥兩腳。曼聯當弗射手韋碧克有傷，作客讓波危危乎，博讓球主勝！

（now 621周四晚8時45分直播）

布魯士90年代為曼聯立下唔少戰功，收山後帶波至今已有15年經驗，今夏老費退位，布魯士完全不獲恩師重視，眼見莫耶斯接過「紅魔鬼」帥印，佢點都有啲唔開心。布魯士賽前話曼聯喺拆禮物日到訪係當地盛事，仲話莫耶斯假以時日可以幫球隊納入正軌，表面客氣，查實係暗寸莫帥家陣帶唔掂班波。
韋碧克受傷削攻力

曼聯聯賽連盃賽4連勝，射手韋碧克近3仗入3粒係頭號功臣，但佢今戰有傷上陣成疑，箭頭尹佩斯、中場卡域克及中堅尼曼查維迪等都未必打得，而爆炸頭中場費蘭尼更要長抖，人腳唔齊下，呢場波絕對有隱憂。侯城之前於英超4次鬥曼聯全敗，不過佢哋今季曾於主場砌低現時英超一哥利物浦，硬淨到爆，有力爆冷搶分，受讓可捧。