換帥翻身擸5分屈福特發維開年

猪拉多纳

英倫球壇繼續開快車，除咗英超之外，英冠亦有一場直播賽事，就係尾場伊奧維主場對屈福特，兩隊近況「天與地」，主隊持續頹勢，相反屈福特換帥後成功反彈，勢頭不俗，今仗梗係捧屈福特贏波慶祝新一年﹗

（TVB 301周四凌晨1時30分直播）
伊奧維近三戰輸晒

現排英冠尾二嘅伊奧維除咗喺上個月初贏咗狀態同樣好差嘅黑池外，其餘五仗非和則負，近三仗全敗外更失咗九球咁多，上仗對住哈特斯菲爾德喺早段領先一球下竟然反輸1比5，球員士氣真係會因此而跌落谷底，而且呢場大敗更反映出球隊後防有極大問題，今仗更有正選門將馬歷史迪治因傷上陣成疑，防線隱憂更大，即使主場出戰，相信都難以反彈。

曾効力車路士嘅意大利名宿蘇拿帶領屈福特今季愈踢愈差，終喺上月中旬引咎辭職，球隊隨即搵嚟蘇拿同鄉、56歲嘅辛尼路接任，呢位意籍教頭執教經驗豐富，曾喺意甲教過錫耶納、巴勒莫同基爾禾等球隊。

辛尼路一上任，屈福特表現即有起色，成功止瀉，亦令一向防守脆弱嘅屈福特搖身一變成為防守力強嘅球隊，近三仗一勝二和只失一球，強如昆士柏流浪都入唔到佢哋波，今仗對住狀態好差嘅伊奧維係搶分好機會，客勝值捧。