刺客重生「大」鬧兵工廠

猪拉多纳

英總第3圈倫敦打吡開戰！

今晚英總第3圈爆發「北倫敦打吡」，由阿仙奴主場硬撼熱刺。呢對世仇次次碰頭都踢得燦爛，齋係近6次交手就有5次開大，況且熱刺喺舒活坐正後大踢「快樂足球」，當中基斯甸艾歷臣、艾朗連儂同艾迪巴約呢對三叉戟猶如重生，愈戰愈勇，呢場打吡相信會有大把波入，捧1.65倍入球大。

（now621、633及660台周日凌晨1:15直播）
阿仙奴原班人腳應戰

阿仙奴近期陷兵荒，幾件主將好似奧斯爾、艾朗藍斯同基奧特都先後打柴，雖然「大眼仔」已克服肩傷，但領隊雲格話唔敢冒險，下場聯賽鬥維拉先會派佢上陣，預計今晚會沿用上仗砌低卡迪夫城嘅陣容出戰。

有睇呢場波嘅朋友，可能會覺得「兵工廠」贏得驚險兼冇乜霸氣，實情卡迪夫城進入下半場已經屯重兵打鐵桶陣，阿仙奴依然能夠喺尾段靠禾確特同賓特拿連隊兩粒贏波，反映出呢班波嘅爭勝決心同火力堅係幾猛。賓特拿今仗受傷缺陣，不過「禾仔」同普多斯基都Fit，攻擊力依然信得過。

對家熱刺上仗以2:1勇挫曼聯，坐正後獲得第2場勝仗嘅新帥舒活，唔單止一改舊帥保亞斯淨係打單箭頭嘅保守作風，上任以嚟仲頻頻起用哈利卡尼同費耶斯等新人，證明球員時代踢防中嘅佢，領起軍上嚟原來咁鬼進取。
艾迪巴約解凍後5場入4球

賽前基斯甸艾歷臣就話，舒活主張嘅「快樂足球」冇保亞斯嗰套戰術咁多掣肘，Remind番一班熱刺球員自幼喺街邊毫無牽掛咁踢波嘅樂趣，齋睇艾迪巴約獲解凍後5仗入4球就知艾歷臣唔係擦鞋。上仗傷出嘅艾迪巴約證實可披甲，有呢位重生箭頭夥拍艾歷臣同艾朗連儂兩位邊路快翼攻堅，今場波邊使驚少波入吖？
Data King阿仙奴「半和」專家

熱刺近4仗入9球。

齋計聯賽，雙方近6次交手有5次開大。

阿仙奴連開4口半場和。
乜都玩錦囊 殘兵出副選撐埋熱刺

阿仙奴傷兵唔少，領隊雲格賽前暗示韋舒亞唔會踢足全場之餘，又話會畀機會16歲「神童」施拉林落場，整體人腳似乎以熱刺較為秤先，熱刺受讓平半下盤玩得過。
英總賽制

英總今輪為第3圈賽事，若90分鐘內打和則重賽；若重賽再和，則需加時決勝負，若加時仍未能分高下，再互射12碼決定晉級隊伍。