世界漫遊 八歲老馬贏悉尼盃

不死鸟

噚日提到騎師廖偉德憑兩年未贏嘅「龐貝尊主」捧走澳洲女皇伊利沙伯錦標後，話要將勝利獻畀因交通意外魂歸天國嘅父親﹔另外，上個禮拜六蘭域馬場舉行嘅悉尼盃，有「克仔」之稱嘅韋紀力，夥拍Ista Kareem勝出呢場三千二百米一級賽，賽後佢將個人榮譽拋諸腦後，並將頭馬送畀Ista Kareem練馬師李圖嘅患病妻子Jackie，希望佢響各人祝福下早日康復。

        以考菲爾德為基地、訓練過名駒「艾斯根都」嘅李圖，響當地馬圈享負盛名，佢同Jackie一直有影皆雙羨煞旁人，可惜Jackie兩年前發現患上癌症，依家正響墨爾本接受治療。對於妻子病情進展，李圖賽後接受訪問嗰陣冇回答記者，但當講到Ista Kareem呢場頭馬，佢就好坦白話係無心插柳之作。因為一個月前佢冇諗過替呢匹馬報爭悉尼盃，直至有日當馬主提議，佢哋先落實出戰呢場大賽。估唔到冇乜計算之下，反而造就呢匹八歲馬成為自1877年Kingfisher以嚟，悉尼盃史上第二匹最老嘅頭馬。

       李圖話Ista Kareem係匹官仔馬，天氣過熱或者濕氣重就周身唔自在，好在上個禮拜溫度適中，結果跑起嚟特別起勁。至於同日另外兩場一級賽，千四米全齡錦標由岳禮華坐騎Danleigh獲勝，而只限兩歲馬跑嘅香檳錦標，就由Onemorenomore爆冷掄元。