馬房秘聞:沈集成緊張神機妙算

不死鸟

▲「聖河」噚朝本來指定由杜利萊操練，但由於騎者響六點幾先至到場，方嘉柏就改柯打叫湯智傑代課，騎者操完後立即去烽火台搵方嘉柏匯報此駒情況。其後杜利萊收操，亦都去咗搵方嘉柏密斟，商議今仗作戰大計。睇番杜利萊響上周五已替「聖河」試過一課泥閘，相信早已摸清馬匹性能，所以今次搵湯智傑代課亦影響不大，馬房亦對今仗信心爆棚。

        ▲徐君禮響晨課一向都勤力操馬，噚朝操完一批東廐馬之後，佢立即替沈廐「神機妙算」快試，其後沈集成去咗機坪接馬，並且與騎者密斟一輪商議軍情。睇番呢匹馬已經減至十五分，相信練者都好心急想贏馬交代，噚朝咁緊張呢匹馬，今戰絕對唔可以睇小。

零距離胃口大開

        ▲「愛拼者勝」轉投胡廐後立即在剛戰上名，胡森接手呢系馬後總算有一個好開始。今戰輪到同主隻「零距離」上陣，呢匹馬轉投胡森馬房之後，只有初期幾課係交由助手操刀，其後不論快跳或踱步全部由副練一手包辦。

        眾所周知，胡森對副練相當信任，由副練主操之馬通常都有好表現。噚朝「零距離」由副練快跳兩段之後，胡森即刻去咗機坪接馬，並向副練查問此駒操練情況。收操後，胡森亦特登返馬房睇「零距離」料盤，見佢胃口唔錯即刻放心晒，有信心今仗轉倉初出即可捧盃。