華倫主場受讓筍爆

猪拉多纳

馬體會留力砌巴塞

西班牙盃16強首回合今夜率先上演，戲碼係華倫西亞主場迎戰馬德里體育會。華倫西亞易帥後表現明顯有起色，上仗更喺打吡戰贏波，球隊現時士氣如虹；相反馬體會嚟緊聯賽要同巴塞隆拿上演榜首大戰，今仗隨時留力等返主場踢次回合先搏殺，阿謙睇好華倫西亞喺主場可保不敗，受讓之下捧「讓球主勝」。

（周三清晨5時開賽）

華倫西亞歇冬前表現平平，球隊最終將教練杜傑辭退，找來阿甲首循環冠軍教頭、聖羅倫素主帥比斯領軍。比斯曾効力華倫西亞，對呢支球隊嘅內部情形相當熟悉，加上現時由兩位前球會猛將艾耶拉及魯費迪分別出任體育總監及總經理，令華倫西亞重現往昔嘅生氣。

比斯上任後首仗冇作出太多變動下，喺打吡戰以2比0輕取利雲特，可見華倫西亞球員已重拾信心，今仗主場出擊有力抵擋馬體會進襲。
留番次回合分生死

馬體會現時喺西甲同巴塞隆拿同得49分，兩隊嚟緊嘅聯賽正面對撼，今場只係西班牙盃16強首回合，仲有次回合可以搏。馬體會主帥施蒙尼深明嚟緊對巴塞一仗嘅重要性，所以今仗隨時收起包括韋拿、迪亞高哥斯達同佐治高基等主力球員，改派副選出戰，相信馬體會難喺首回合先拔頭籌，讓球主客和馬體會讓一球，阿謙捧「讓球主勝」。