馬體會受讓有揸拿

猪拉多纳

巔峰對決 新貴挑戰王朝

今輪西甲爆發榜首大戰，異軍突起嘅馬德里體育會主場擺陣，挑戰「西甲最強」巴塞隆拿。巴塞雖有王牌美斯傷愈復出，但撞正唔係人咁品嘅馬體會，實畀呢班兇神惡煞嘅山賊圍剿，隨時逼到巴塞有氣冇碇抖，加埋聯賽主場全勝嘅金漆招牌，今仗有得受讓真係筍到爆，讓球主勝值得捧場。

（now 632周日凌晨3時直播）

先講聯賽形勢，依家巴塞同馬體會同得49分叮噹馬頭，由於西甲係計對賽成績而非得失球定排名，若果今仗邊隊贏波便可佔先機，對爭奪冠軍非常關鍵。巴塞有王牌美斯傷愈復出，周中西盃對基達菲後備入場省兩粒添，好似唔錯喎，但鑑於佢今季頻頻受傷，若果遇到一啲鍾意硬撼硬嘅球隊，身體未弗嘅佢好容易再整傷。
兇悍打法剋住巴塞

咁啱馬體會主帥施蒙尼強調身體對抗，中前場如迪亞高哥斯達、佐治高基、堤亞高文迪斯、奧利華托利斯、基比全屬打仔格，各人不惜氣力瘋狂逼搶，呢種兇悍踢法，正係技術流巴塞嘅剋星。

查實季初西超盃決賽正係呢兩支球隊對決，馬體會兩回合都打和巴塞，「地上最強」嘅沙維、布斯基斯、恩尼斯達等球星，完全唔夠馬體會班悍將搶中場，甚至要勞動美斯返後幫波，影響攻力，最終「床單兵團」只因作客入球飲恨非常唔抵，但證明呢招奏效，相信今仗會照辦煮碗。

況且計埋盃賽，馬體會今季14仗主場嘅正式比賽，取得13勝1和嘅佳績，其中聯賽9仗全勝，非常犀利，為咗爭標，為咗推翻王朝，今場絕對唔赦巴塞，讓球主客和馬體會仲受讓一球，斯維誠意推介讓球主勝。