曼聯「史」波要反

猪拉多纳

莫斯耶屢創羞家紀錄

紀錄，係用嚟破嘅！「紀錄王」莫耶斯又刷新紀錄啦，曼聯14年嚟第1次輸畀新特蘭、2001年嚟首次3連敗、1992年嚟第1次喺1周內3戰皆北，就連老將傑斯都獻出自己嘅「第1次」，對新特蘭場波擺咗効力曼聯以來嘅首個烏龍球！有莫耶斯領軍，曼聯仲有咩紀錄係破唔到呢？繼足總盃喺奧脫福倒灶輸畀史雲斯之後，雙方今晚再度喺「夢劇院」交鋒，小妹相信史雲斯可以再落「紅魔」面，一於捧2.6倍「讓客」。

2013年尾曼聯以6連勝衝線，諗住佢哋踏入新一年會食住個勢力爭上游，但點估到球隊會連環喺聯賽、足總盃同英聯盃出醜吖！莫耶斯搞到「紅魔」個朵臭晒，所以當Yennie聽到英超賽會將莫耶斯列入12月份「英超最佳領隊」候選名單嗰陣，真係覺得好火滾！
費迪南氹C朗回巢失敗

英國《每日郵報》尋日仲登咗份由wealthx.com做嘅數據，指朗尼憑住25萬鎊周薪加上豐厚嘅贊助合約，以4,500萬鎊（約5.74億港元）身家成為英超富豪榜「一哥」，佢嘅隊友里奧費迪南亦憑個人品牌#5撈到盆滿缽滿成為第3富豪，奈何剛成為12月份曼聯最佳球員嘅「魔童」有傷在身，費迪南就走緊下坡，舊年夏天佢又游說唔到Ｃ朗返歸，曼聯球員錢就多，幫唔到隊波嗰吓弊呢！
史雲斯韋菲特邦尼大勇

反觀史雲斯雖然有米捷足踝受傷仲未出得，好在另一鋒將韋菲特邦尼狀態大勇，元旦日鬥曼城梅開二度，上場足總盃更為「天鵝」頂入關鍵性頭槌淘汰曼聯，簡直係曼市剋星，Yennie相信今晚「天鵝」只要保持上場對「紅魔鬼」嘅表現，莫講話唔輸，贏多鋪曼聯都仲得呀！