曼城強襲紐卡素

猪拉多纳

「新舒利亞」反轉聖占士公園

弗爆「新舒利亞」尼格度空襲聖占士公園！英超進攻王曼城今周造訪紐卡素，曼城「野獸」中鋒尼格度狀態勇極，成為英超今期當紅射手，撞啱「喜鵲」防線正選四缺二，無力抵擋對手狂攻，預期今戰曼城有大把機會數胡，一於熱捧客勝！

（now 621周日晚10時05分直播）

曼城王牌前鋒阿古路養傷多時，最初唔少朋友擔心球隊攻力會受削，事實證明尼格度級數不遜阿古路，呢位西班牙中鋒今季於各項賽事廿九戰轟入十八粒，剛過去周中又於盃賽連中三元，勒都勒唔住！尼格度有身形有射術，而且適應力強，無論拍住迪斯高打雙塔或者自己打箭頭都掂，呢點正正係教頭比歷連尼重用佢多過迪斯高嘅原因。
紐卡素防線天殘地缺

紐卡素今場面對聯賽廿戰轟入五十七球嘅曼城，就算想死守都唔易頂得住，最大鑊係球隊防線唔齊腳，右閘迪保治坐波監，中堅高洛仙尼養傷，連左閘大衞辛頓都未必踢得，後防四大天王隨時冇咗三件，連門神告魯爾都係啱啱傷愈復出，呢條防線真係令人擔心。「喜鵲」前面靠晒法國射手雷米爭取士哥，但後防咁鬼流，只怕佢地入埋唔夠輸。
曼城近八聯賽對戰全勝

曼城快翼捷西斯拿華斯、守將米卡李察士及迪米捷利斯等統統傷愈，大把輪換本錢，唔怕班兵搏殘。球隊近八次聯賽對住紐卡素全部贏晒，包括首循環主場大勝4比0，今次又對住私房菜，唔係唔起筷啊！
領隊Chit Chat

柏杜（紐卡素領隊）：首循環對曼城大敗我哋打得唔好，但其後已證明實力，只要擁有最佳人腳同狀態，我地都係一支好球隊！

比歷連尼（曼城領隊）：我仲記得之前點輸畀卡迪夫城同維拉，但希望球隊保持呢種主攻踢法，最重要係踢出自己風格嘅足球！