「史獨」復出 紅軍誓破魔咒

猪拉多纳

今晚英超尾場史篤城主場對利物浦，自從史篤城08/09年球季重返英超以來，利物浦於聯賽作客不列顛尼亞球場從未贏過，不過數據係被人來打破，以紅軍今季強勢，加上有「史獨」史杜列治傷愈夥拍大勇嘅蘇亞雷斯攻堅，今場一於捧利物浦打破宿命開客W。

（now 622周一凌晨零時10分直播）

利物浦對上五次聯賽作客史篤城兩和三負，最近三季全部落敗，不過今季英超已經多次出現有球隊打破多年不勝宿命嘅場面，所以呢類數據只可以用嚟參考。啱啱贏得十二月份最佳球員嘅蘇亞雷斯狀態有幾弗已經唔使再多講，佢喺上周足總盃對奧咸只係做後備，可以養精蓄銳爭取士哥，而且最令紅軍球迷振奮嘅消息係另一射手史杜列治已傷愈，今仗可以復出，令前線攻力更加如虎添翼。
史篤城近仗狂失波

史篤城今季主場曾經打和曼城及贏過車路士，成績絕唔失禮，不過喺曉士領軍之下，球隊後防明顯冇過去幾年咁穩陣，連盃賽在內佢哋近六場比賽一共失咗十三球，平均每場失兩球以上，加上近期表現突出嘅艾薩迪因借用條例未能倒戈，勢令主隊威脅力大減，紅軍只要踢出水準有望全取三分。