曼城着火擒喜鵲

猪拉多纳

冇阿古路有「野獸」都掂

曼城前鋒尼格度今季入球停不了，綽號「野獸」嘅佢踏入2014年有好多願望，其中一個就係超越隊友阿古路成為「藍月亮」首席「士哥拿」。呢個機會今晚嚟嘞，曼城會造訪近況低沉兼後防唔齊腳嘅紐卡素，相信喺「有偈傾」嘅迪斯高支援下，尼格度實有大把機會入波，曼城讓半一捧上盤。

（now621台周日晚10:05直播）

阿古路上個月中打柴之後，都唔知幾多人擔心曼城會冧檔，不過「藍月亮」打後7場波贏足6場，證明冇阿古路問題唔大。最關鍵原因係尼格度孭起晒入球重任，迄今所有賽事加埋已經入咗18球，只係落後阿古路1球。適逢「阿Kun」已經復操並落實下場聯賽鬥卡迪夫城復出，尼格度今仗一定要把握時間達成願望。
阿Kun復操鬥卡城復出

「野獸」賽前向英國《電訊報》話：「2014年我有3個願望，第1係亮相溫布萊，第2係幫曼城捧盃，第3就係要超越阿古路成為曼城首席射手。我知阿古路復出之後會好多波入，所以我更加要把握時間過佢頭。」尼格度周中喺英聯盃4強首回合大演帽子戲法，幫曼城大炒韋斯咸6蛋，佢透露隊友迪斯高開始同佢講多咗西班牙文，溝通好咗自然有火花。「雙塔」今晚又再合作衝鋒陷陣，加埋出爐非洲足球先生耶耶托尼足踝傷無大礙可披甲，紐卡素後防肯定有得震冇得瞓。
紐卡素後防殘陣

其實睇小「喜鵲」皆因佢哋條防線甩皮甩骨，除咗中堅高洛仙尼長抖之外，右閘迪保治又話要停賽，加埋大衞辛頓大腿受傷未必落場，咁嘅後防點頂得住曼城嘅進襲呀？況且紐卡素最近連輸3場，近14次喺英超鬥曼城又輸足12場，今鋪輸少球都偷笑。
Data King 紐卡素半場4連和

‧雙方近8次英超對壘紐卡素輸晒。

‧曼城近11次同紐卡素喺聯賽交手攻入30球，場均入2.7球。

‧紐卡素連開4口半場和。
乜都玩錦囊 Yaya專射鵲博首球

唔講唔知，原來剛啱周中傷咗足踝嘅曼城中場耶耶托尼，至鍾意恰「喜鵲」，呢位新鮮出爐嘅非洲足球先生，近4次聯賽鬥紐卡素，就足足入咗5球，既然「雙塔」尼格度同迪斯高二傳咁耍家，話唔埋今場又帶挈今季勁入波嘅「Yaya」再次射「鵲」，首名入球捧有6倍嘅耶耶托尼好路。