紅軍「篤」定大炒

猪拉多纳

「SAS組合」強勢歸位

利物浦依家落後榜首嘅阿仙奴6分，爭冠係有難度，但係仲有好大機會可以達成球隊今季最大目標，就係取得歐聯資格喇！今晚紅軍造訪史篤城，史杜列治極有可能復出，重新拍住蘇亞雷斯組成「SAS組合」，預料將會上演一場入球騷，中位數2.5球，一於捧1.7倍「入球大」啦！
史篤城副選門將欠穩

紅軍今季確實係自2008至09球季以嚟，最接近聯賽冠軍嘅一季，啱啱當選12月份英超最佳球員嘅蘇亞雷斯絕對功不可沒，佢仲話自己已經「脫胎換骨」，唔再係以前脾氣極臭嘅「咬人蘇」添！除咗「哨牙仔」生性咗，喺佢季初停賽嗰陣單天保至尊嘅史杜列治亦傷愈，至於上仗復出嘅「神奇隊長」謝拉特對攞英超冠軍仍然充滿期望，更坦言：「如果有人同我講，整番個全身紋身就贏到英超嘅話，我聽日就即刻去紋呀！」證明呢位老將鬥志仍然十足o架！

史杜列治復出，相信可以令近8戰喪入23球嘅紅軍火力繼續提升，皆因佢受傷之前，同蘇亞雷斯合組嘅「SAS」組合，喺7場聯賽合力製造咗14個「士哥」！其實單計「阿蘇」喺今季英超聯賽已經有20球進帳，佢為咗幫球隊打入前四兼捧走上季失落嘅英超金靴，今晚實拎史篤城祭旗。

客隊史篤城嘅正選門將比高域手指骨折斷要抖6個禮拜，要由老將蘇連遜頂上，後防實力減弱。相信今晚就算有主場之利，都會出現唔少失球。客隊咁攻得，主隊防守又曳，「客W」又嫌熱，一於博「入球大」！