曼城「超級替補」迪斯高唔放得

猪拉多纳

1月份轉會窗重開，係眾多球會對症下藥、執靚陣容嘅好時機。轉會傳聞此起彼落，但未見有重磅收購成事之前，兩位極具名氣嘅教頭就率先加入英超大家庭。蘇斯克查對英超球迷固然唔陌生，只係作為主帥帶隊，就為球迷帶來唔少新鮮感。至於西布朗相中梅爾，就認真識貨。早兩年評述西甲之時，已發覺梅爾帶隊頗有風格，帶中下游球隊更特別有心得。兩位新教頭登陸英超，應可為球隊帶來進步。

曼城踏入2014年繼續高歌猛進，雖然缺少王牌射手阿古路壓陣，但一對箭頭繼續狀態火爆，尼格度、迪斯高「雙塔」喺聯賽盃合共炮製5球，勢將曼城帶入新溫布萊球場。
紐卡素對強隊有心得

尼格度今季喺4條戰線猛咁「士哥」，總入球僅次阿古路，絕對係曼城今季最佳收購。迪斯高論腳法同靈活度都唔及阿古路、尼格度，不過護球、搶點能力同牽制作用都比兩位拍檔有過之而無不及。曼城要多線發展，迪斯高呢個「超級替補」絕對唔放得走。

紐卡素經過11至12月一段蜜月期後，最近連輸3場明顯回落，不過主場出擊嘅「喜鵲」始終有一定戰鬥力，對強隊亦有一定心得，早前聯賽盃8強主場鬥曼城亦只係僅敗，加上「藍月亮」今季主客表現落差甚大，此消彼長，曼城最多只可小勝而回。