維拉利爾難剃蘇

猪拉多纳

兩軍藏殺着 西盃先晒冷

今晚西甲有場獨腳戲，由「黃色潛水艇」維拉利爾主場鬥皇家蘇斯達。由於呢兩支球隊咁啱被抽中喺西班牙盃16強碰頭，今場聯賽又咁蹺夾喺西盃兩回合中間，搞到佢哋一個星期要對足三次，雙方定必收收埋埋唔肯見真章，「黃色潛水艇」雖有地利之助，但喺戰意不明朗下要讓到半一實在太辣，不妨捧皇蘇嘅下盤。

（周二清晨5時開賽）

或者大家會話，兩軍都要為前四嘅歐聯入場券而戰，不過聯賽仲有成半季流流長，呢場嘅得失未至於太關鍵，兩隊將注意力放喺嚟緊西盃次回合好正常。由於一周要對足三次咁多，雙方教頭難免會變陣，以求擾亂敵軍。

睇番上周中嘅西盃首回合，皇家蘇斯達正選收起隊長皮亞圖及射手卡路士韋拿，而維拉利爾亦未盡全力，只畀前鋒佩比後備入替，弗到爆嘅箭頭烏捷出都冇出，雙方隱藏實力之下結果互交白卷，預計今仗聯賽大家會繼續收收埋埋，留番喺嚟緊周中嘅西盃次回合先一鋪晒冷。
近六對碰和咗四次

其實呢兩隊可謂半斤八両，之前六次對碰和咗四次，踢落勢均力敵，今仗維拉利爾叫做有地利要讓到半一，實在有啲過咗火位，皇家蘇斯達絕對有力全身而退，斯維認為下盤值得一試。