雲格復仇戰廠仔劏維拉

猪拉多纳

「雲格復仇戰」今晚上演！季初阿仙奴主場以1:3慘負阿士東維拉，搞到唔少「廠迷」對雲格死心，最終激發呢位主帥燒錢買人令「兵工廠」升呢做爭標分子，今晚輪到阿仙奴喺英超作客近況慘淡嘅維拉，絕對有力炒起對手復仇，一於捧2.33倍「讓客」啦！

（now621台周二凌晨4:00直播）
首輪輸波慘被球迷寸爆

阿仙奴喺今季英超開咧戰主場對維拉輸得勁肉酸，當時唔少球迷嘅不滿情緒爆發，喺比賽期間向雲格高唱「你根本唔知自己做緊乜」，仲叫佢拎錢買人添！不過講真，如果呢場唔係輸得咁慘烈，雲格又點捨得破慳囊買入「救世主」奧斯爾，又點會激發到班「廠仔」嘅鬥心，成為爭標分子先？
維拉勁頹近7戰輸5鋪

今時唔同往日，喺各項賽事取得4連勝嘅「兵工廠」就算冇咗基奧特、艾朗藍斯同禾確特3位「士哥拿」，仍然有中場大佬路斯基、普多斯基同埋辛迪卡索拉齊齊數胡，上仗對熱刺有波入嘅路斯基，更傳獲阿仙奴破天荒開出優厚條件續約，相信大家都知「兵工廠」好少留用30歲以上嘅老將，咁就證明球會真係吸取咗教訓，喺球員買賣政策上改進唔少啦！就算阿仙奴嘅鋒力未勁到好似曼城咁場場數人4、5粒，但近排班後防球員勁生性，連續3場都零失球，今晚絕對讓得起維拉。

雖然維拉喺主場出擊，不過佢哋今季喺自己地頭戰績特別差，喺各項賽事13戰居然只得3勝，上仗喺英總對住錫菲聯仲輸埋波添！就算計埋作客，維拉一樣頹到震，近7戰輸足5場，其中得1場冇失波，後防大將華亞爾仲未知出唔出得，今鋪睇怕要輸鑊甘喇！
Data King 賓迪基近5個月未入過波

‧阿仙奴自98年12月以嚟造訪維拉未輸過。

‧「兵工廠」連續5仗半場不失。

‧維拉射手賓迪基自上年9月之後都未入過波。
乜都玩錦囊 小兵防守掂撐埋入球細

維拉20輪聯賽過後僅入19球，想喺英超防守力最強嘅阿仙奴身上攞着數難過登天。考慮到「兵工廠」近期狂開細，唔想太進取玩阿仙奴「讓客」嘅朋友，可以考慮拎客W做過關膽，又或者博個2.05倍入球細。