國米要爆「基」振士氣

猪拉多纳

今輪意甲壓軸戲碼，由國際米蘭喺聖西路主場迎戰基爾禾。國米近排戰績麻麻，好在今場對手係近況比佢哋差更多，每逢作客前線例啞火嘅基爾禾，「藍黑軍」當然要趁機喪攻搶分，務求大勝重振士氣，2.12倍「讓主」博得過。

（TVB301及廣東體育周二凌晨4:00直播）
基爾禾作客9戰入得4粒

國米日前喺意盃16強被烏甸尼斯淘汰，近6場聯賽淨係贏過AC米蘭，中場古亞連今場又要坐波監，睇落負面因素一籮籮。但大家唔好忘記，「藍黑軍」喺意盃實情係半力出擊，收起甘比亞素同蘭奴捷亞等猛將，箭頭柏拉斯奧同中場列卡度艾華利斯亦只係踢得半場，教頭馬沙利擺明留力搏今鋪，今場遇着弱旅基爾禾，肯定想大勝對手祭旗，重返勝軌啦！

瀕臨降班邊緣嘅基爾禾，進攻弱雞係致命傷，踢咗18場波入得嗰13球，其中9場客戰仲衰到入得4粒咁大把，每場平均連半球都冇，試問點樣威脅到國米防線？

再者，基爾禾近4戰得1和3負，0:0賽和卡利亞里嗰場若非對手12碼宴客「放生」佢哋，家陣已經4連敗，最大鑊係經驗老到嘅列干尼今晚要停賽，基爾禾冇埋呢名防中做防線第一道屏障，輸少粒都要還神啦！