皇馬半場勝速食奧沙

猪拉多纳

副選爭上位次回合照攻

今晚西班牙盃16強次回合尾場之一，「銀河艦隊」皇馬作客奧沙辛拿。由於首回合奧沙輸0比2，眾將又心繫護級，今仗hea踢唔奇，皇馬主帥安察洛堤就算收起主力，好似艾華路莫拉達、謝斯洛迪古斯等優質生牯仔，仲唔搶晒韁爭取表現氹「肥安」咩？隨時上半場就速食奧沙，半場客勝值博。

（now 632周四凌晨4時30分直播）
奧沙落後留番啖氣護級

奧沙辛拿總算擺脫季初嘅低潮，啱啱喺聯賽迎戰貝迪斯踢到飛沙劈石，搏到好盡先贏波，唔好睇奧沙排緊第13位，由於今季西甲中下游分數咬得好緊，其實佢哋距離安全線只係多5分，仍要為護級搶分，況且奧沙喺首回合以0比2輸波，對手仲要係皇馬，出線機會渺茫，加上護級大過天，亦無謂再喺盃賽嘥彈藥，今仗hea住踢等收工都似。

當然皇馬lead住兩粒喺手，教頭安察洛堤或會畀一些主力休息，不過佢班後備兵亦唔嘢小，好似青訓產品謝斯洛迪古斯，喺首回合正選披甲即有士哥，演出贏盡掌聲，難怪畀主帥安察洛堤錫到佢燶。

近日有傳「新魯爾」艾華路莫拉達會被外借阿仙奴，如果佢想留低的話，便要效法師弟謝斯洛迪古斯趁機楔位，由於今仗好大機會收起箭頭賓施馬，加上奧沙辛拿已經無心戀戰，仲唔係莫拉達等小將騷哥利嘅最佳時機，梗係一開波就搶晒韁，想盡快鎖定勝局氹「肥安」，半場客勝有1.62倍咪錯過。