祖記羅馬大廝殺

猪拉多纳

意大利盃8強斑馬夜訪狼穴

意大利盃8強提早上演「決賽戲碼」，羅馬在狼穴主場迎戰祖雲達斯，羅馬喺聯賽失分太多，惟有轉打盃賽主意。何況對手正係死對頭祖記，為盃或為啖氣，必定傾力一搏。「斑馬兵團」如日中天，創下意甲12連勝紀錄，頻頻大炒對手，維達爾、洛蘭迪、羅保普巴等中前場，個個着晒火，足以撕開羅馬防線。兩軍磨拳擦掌勢必再開大片，首選1.8倍入球大。

（now633及660周三凌晨3時45分直播）

羅馬月初聯賽作客慘吞祖記三蛋，兼有兩人被逐，場面非常火爆。羅馬已落後對方8分，從後趕上機會好微，現時除咗力保前三位參加下屆歐聯外，最渴望就係捧意大利盃，以打破6年錦標荒。事實上，羅馬今季喺魯迪加西亞執教下，踢出近年代表作，雖然早前水準一度滑落，但隨住隊長托迪傷愈復出，已重回正軌，近2場取得大勝共攻入7球，夠晒霸氣。
兩軍攻擊瓣數多

羅馬同祖記有個共通點，就係攻擊點多，除咗射手迪斯度、托迪數胡之外，史杜特文、比真歷等中場後上攻門亦相當煞食。唔好忘記呢支首都球隊今季主場仍然不敗，必定趁地利優勢，報回聯賽大敗之仇，挫死敵銳氣。

祖雲達斯現時喺意國球壇明顯超班，足以囊括本土錦標。球隊最大優勢係兵源非常充裕，歐聯出局後，更有人滿之患，令正選位置競爭更激烈，只要有機會上陣都會搏到盡，正係祖記經常大炒對手嘅主因。祖記只要淘汰埋羅馬，奪冠前路就一片光明，乘聯賽12連勝強勢，力爭一鼓作氣摧毀對手。