AC-1吐烏氣

猪拉多纳

好攻施多夫繼續練靶

今晚深夜意大利盃8強有睇頭，由施多夫領軍嘅ＡＣ米蘭再上征途，主場對烏甸尼斯。施多夫處子騷成功響頭炮，佢嘅進攻足球理念好受球員歡迎，連一向牙眨眨嘅巴洛迪利都話心悅誠服。呢位荷蘭少帥推行華麗戰術奏效，繼續狂攻對手。烏甸尼斯聯賽捲入降班漩渦，無心戀戰盃賽，勢成施多夫練靶場，直取讓球主勝。

（now 633及660周四凌晨4時直播）

施多夫球員時代司職中場指揮官，體內充滿進攻細胞。最重要係老闆貝魯斯干尼鍾意睇悅目足球，施多夫新官上任當然識做，報答對方提攜，上仗狂轟維羅納，控球率達7成，全場有25次射門，多對手足足一倍，如果把握力好啲絕對唔止贏一粒。

事實上，AC優秀球員集中喺中前場，進取型戰術比較有利巴洛迪利、卡卡、羅賓奴、本田圭佑等好手發揮，展現球隊強項。經過上仗「熱身」後，預料今仗進攻演出會更佳。
烏甸留番啖氣護級

烏甸尼斯上圈意盃淘汰國際米蘭，全因對手更不濟，烏軍近兩場聯賽全敗，勁失6球，先至係佢哋原本水準。特別係上仗領先1球兼打多1人之下，最終竟然輸2比3畀拉素，認真打擊士氣。烏甸現時喺聯賽僅比排尾3嘅薩斯索羅多3分，隨時跌入降班區，首要目標係保住甲組位，爭意盃對佢哋而言太奢侈，教練古度連今仗或派副選應戰，ＡＣ仲唔嗒晒糖咩。