蜜蜂兵剪「布」賀新歲

猪拉多纳

上場失威今晚搶韁o趙魚腩

多蒙特喺聯賽畀榜首嘅拜仁拋到冇雷公咁遠，但係蜜蜂軍團避免來季歐聯要打外圍賽，都仲要努力專注聯賽；上場對奧格斯堡失威只得1分，今輪佢哋作客榜尾球隊布倫瑞克，仲唔搶韁搏到盡？今場一於撐多蒙特，捧1.72倍「讓客」！

(有線61、201及廣東體育周六凌晨3:30直播)
巴拉打柴奧巴美揚移右路

蜜蜂軍團上輪主場鬥奧格斯堡，最終只能以2:2握手言和，但最大鑊嘅係右翼巴拉斯塞高斯基，十字韌帶重創要提早收「咧」。呢位波蘭隊長面臨長抖，球會高層都話唔排除要趕喺1月轉會市場關閉之前買人。英國《每日鏡報》近日爆料，多蒙特有機會以超筍價500萬英鎊（約6,400萬港元），得到不獲重用嘅熱刺中場賀治比。呢位中場喺史浩克04打出名堂後，上年1月加盟熱刺但適應唔到英超節奏。如果今次成事，對急住要人嘅多蒙特同想獲得出場機會嘅賀治比，可以話係雙贏。

今場對住布倫瑞克，教練高普可能要將射手奧巴美揚移去右路，填補巴拉斯塞高斯基嘅空缺。雖然人腳變動可能對整體合作多少都有啲影響，但對手布倫瑞克只係一隊魚腩，今場用新排陣要贏都冇難度啦！