錫菲聯戰意高下盤致「富」

猪拉多纳

足總盃出名係爆冷溫床，今晚「甲組仔」錫菲聯喺第4圈（32強）重賽再遇富咸，相信係爆冷良機！事關富咸輸到懵，以美度古為首嘅雷霆救兵又落唔到場，貼埋交通費畀Fans隨隊嘅錫菲聯戰意高昂，要砌低低迷嘅富咸唔係天方夜譚，作客受讓半一，要撐下盤。

（now621及635台周三凌晨3:45直播）
貼錢畀Fans征富咸

一隊英超，一隊就係英甲，但富咸首戰踢落完全冇甜頭，上月底雙方交手，先拔頭籌嘅錫菲聯早早有中場主將杜爾尼領紅被逐，以眾凌寡嘅富咸幾經辛苦先扳平1:1搏到重賽機會，咁嘅演出真係唔抵晉級喎！係，富咸人腳係勝一籌，但呢支英超包艇隊近4場聯賽輸晒，轉會窗閂門前簽入嘅前鋒美度古、賀治比等生力軍又唔符合上陣資格，讓唔讓得起錫菲聯都成問題。

雖然話錫菲聯喺英甲跌到落降班區域，但暫時將護級任務拋諸腦後，領隊哥夫表明會強陣出擊，會方喺賽前更宣布所有隨隊出征嘅球迷可免費搭隊巴，擺到明造勢。再講，首戰射爆富咸大門嘅前鋒基斯樸達已告傷愈，有佢拍荷西巴斯達衝鋒陷陣，揪贏埋富咸都得呀！
英總賽制

今場為第4圈重賽。若90分鐘內打成平手，需加時30分鐘決勝負，倘加時仍打和，則互射12碼決勝。