贏3W化身馬場財神 雷神三寶唔犯本

猪拉多纳

　　年初三賀歲賽有熱有冷，當中以雷神最威水，化身成為馬場財神，又贏3匹，雖然話，「金威勝」5倍、「飛馬之威」3倍半、「神舟十號」18蚊，炒埋唔夠一碟，最起碼有得贏，唔會令到捧場客連場失望，新年流流，意頭緊要，冇得贏，真係大吉利是。

　　數數最近賽事莫雷拉頭馬數量，1日贏唔到3、4場反而係新聞！畀人感覺好似袋袋平安，總會有着落。今次又騎足9場，信唔信佢好？寧買當頭起，唔做「雷粉」，仲有邊位騎師更值得信任呢。

　　呢次莫雷拉手上有好幾匹馬近績靚，諸如「城中話題」、「驍武」、「黃金宅男」等馬，嘩，數落唔通今次開條雷神三寶！唔係冇咁嘅可能。熱熱哋冇相干，勝在唔犯本，呢1注買梗。

　　喜益善回師主項

　　其他場次，「喜益善」之前兩勝谷中1000米，上次升二班輸嗰場係1200米，唔可以證明唔夠班，返回主項，又會唔同；「的確好靚」前仗贏得出色，隔完1場又嚟過，一哩曾上名，唔會比1800米失色；「創出商機」馬夠快，排檔好，放得出，有力帶到。總括而言，呢一晚都係雷神天下。