歡笑多多 韋達補飛

猪拉多纳

　　目前最當時得令梗係莫雷拉，成日有馬贏，另1位猛將杜滿萊都係騎得之人，又唔會特別叫座，博佢啲馬WP係唔錯選擇，何況，現時莫雷拉啲馬實在熱得太犀利，根本冇乜「水份」。

　　第四場四班1000米。「創出商機」上次追入第二，畀「海之濤」走甩冇計，今次狹路相逢，檔位唔同，磅位亦唔同，好大機會反先。但老實講，隔晚捧到得十幾蚊W，真係覺得唔抵，唔通呢匹馬實力可以同廐友「神舟十號」比咩？後駒都係十幾蚊贏，之所以，「創出商機」係機會馬之一，捧得太熱，揸膽算嘞，唔會博W。

　　第八場三班1200米。「歡笑多多」季初贏完1場，之後冇貨賣，近兩場又跑番好，攻勢時有時冇，係就係靠唔住，不過，佢上場走勢真係好吸引，唔係走位蝕得滯，應該入到前三名。難得韋達未失策騎權，冇理由唔生生性性，一定施展渾身解數。

　　第九場三班1800米。「幸運勝利」近仗由蔡仔騎硬係論論盡盡，呢匹馬係難騎，成日會內閃，呢次換上杜滿萊，呢位年青騎師手力夠，應該難佢唔倒。再者，呢匹馬今季未贏，點會唔諗計交代。