金身被破巴塞谷氣大反撲

猪拉多纳

另一場西盃4強首回合，巴塞隆拿主場火併皇家蘇斯達。「地上最強」剛戰被打破連續31場聯賽主場不敗身，今晚梗係想搵皇蘇祭旗振軍心，不過近期佢哋後防近期踢到失晒魂，難頂對方基沙文、卡路士韋拿嘅快速反擊，隨時合演入球騷，就算中位數調至3.5球照捧大盤。

（now 632周四清晨5時直播）
碧基領軍防線發夢

巴塞不嬲喺魯營主場惡到暈，但前幾日聯賽竟爆冷畀華倫西亞反勝3比2，實際上前線美斯、阿歷斯山齊士、柏度洛迪古斯表現對辦，美斯最近化身助攻王頻頻造就隊友，上仗意外輸波，今仗西盃一定搏甩髀向粉絲交代。只係後防唔多生性，碧基經常夢遊球場，門神域陀華迪斯亦犯上低級錯誤，呢條防線猶如豆腐渣靠唔住。

皇蘇上仗作客慘吞馬體會四蛋，不過喺末段特登收起基沙文及卡路士韋拿，擺明係為今仗留力，呢對前線雙子星以快速反擊見稱，今場隨時係佢哋搵食好時機，況且皇蘇近年作客魯營，經常大手交易，就算中位數調至3.5球都冇有怕，1.62倍嘅大盤咪嫌少。