史雲斯軍心亂難贏卡城

猪拉多纳

英超尾場上演威爾斯打吡暨護級關鍵六分波，史雲斯大戰前換帥亂軍心，隊長蒙克於主場暫掌球隊鬥卡迪夫城，不過，「天鵝」近況低迷，呢個任務唔易完成。「卡城」一月增兵後戰鬥力大增，今戰可保不敗，受讓半一要下盤！

史雲斯周中炒咗主帥米高盧特立，仲禁止佢去訓練場同班兵道別，令呢位名帥非常不滿，佢話自己被無理解僱，聲言會採取法律行動，無啦啦搞壇咁嘅嘢，好難唔亂軍心囉。球會主席贊堅斯寵信隊長蒙克，安排佢暫時領軍，仲話唔排除畀佢坐正，今場打吡戰係佢考牌之作，呢位哥仔有民望，但欠教波經驗，臨危受命都幾牙煙。

史雲斯暫列十二有廿四分，多尾二嘅卡迪夫城三分，呢場係護級六分波。「天鵝」今季咁折墮，某程度係因為王牌中鋒米捷成日傷，佢今戰仍然上陣成疑，中場主力舒維爾亦要做體測先知踢唔踢得，唔齊腳好難搞喎！大軍近十場聯賽贏一次，對手係包尾大幡富咸，踢到冇乜信心，今場贏唔贏到都成問題，讓到半一揀唔落手。
卡迪夫城新兵有貨交

卡迪夫城唔算好叻，但新帥蘇斯克查搵咗唔少實用新兵幫手，其中中鋒堅韋尼鍾斯上場成為贏波英雄，曼聯借將韋費特沙夏後備落場亦交足貨，協助球隊取得蘇B加盟後首場聯賽勝仗，家陣士氣好過「天鵝」好多，呢次踢得穩穩陣陣求不敗唔係難事。