蒙通聯炒河攞威

猪拉多纳

越南魚腩送上門

泰國聯賽近年愈搞愈旺，武里南聯上屆喺亞冠盃成一路奇兵，死敵蒙通聯不甘被騎住，新季搵來武軍舊帥史葛曲巴領軍，仲簽埋前卡迪夫城中鋒保夫萊特，今晚於亞冠盃外圍賽第二圈主場迎戰越南球隊FC河內，殺氣騰騰大炒格，捧讓球主勝！

(now 670周六晚8時30分直播)

武里南聯上季亞冠盃殺入八強，同時橫掃泰超、泰足盃、泰聯盃同泰超盃冠軍，令蒙通聯冇晒飛士。蒙軍新季出招還擊，先任命史葛曲巴為帥，這位英籍教頭去季突然離開武里南聯，新季掉轉槍頭，成為泰國球壇熱話。兩軍上周剛於泰超盃交手，蒙通聯又輸0比1，輸波輸面，谷埋成肚氣，轉戰亞冠盃一定砌盡發洩。
FC河內未夠班

蒙通聯以往靠泰國神鋒鄧達打晒，史葛曲巴搵埋同鄉保夫萊特幫手，呢個中鋒身高1米92，假假哋代表過英格蘭一次，依家只係31歲，仍處當打之年，打亞洲賽事堅贏卡士，佢個拍檔鄧達早前落實於下季轉投西甲艾美利亞，足見佢都有料到，兩個超班射手拍住上，連次級亞洲賽事亞協盃都未踢得掂嘅河內好難頂得住！
歷基韋亞明恰新丁艾希迪

同日卡塔爾「一哥」歷基韋亞主場對巴林球隊艾希迪，歷基韋亞陣內最大名氣係踢過曼城嘅斯洛伐克中場華迪美韋斯，查實隊內仲有多名歸化兵，守將迪美查奧爾、中場保迪亞夫來自法國，另一中場路爾斯祖利亞就係巴西兵，變相多咗幾個外援幫手。巴林球隊艾希迪係亞冠盃新丁，點睇都唔夠砌，要讓球主勝！

(周六晚11時開賽)