打比郡QPR爭升班大駁火

猪拉多纳

英冠今輪有場前列對決，打比郡主場硬撼昆士柏流浪（QPR），兩隊於冬季轉會窗都搵到有料前鋒加盟，決心爭升班，打比郡個車仔借將班福特連場士哥弗爆，QPR幾大射手個個等數胡，今場大駁火格局，玩大盤最好！

（TVB 301周二凌晨3時45分直播）

英冠頭兩位可以直接升班，打比郡同QPR現時分列第四及第三，今場係爭升班關鍵六分波，點會唔搏吖！打比郡現時係英冠進攻王，開季至今29戰轟入57粒，上月仲由米爾頓凱恩斯搶走車仔新星班福特，呢位哥仔連續四場有入波，勒都勒唔住，依家班波攻力更勁，有本錢繼續打進攻足球。

另一邊廂QPR老帥夏利列納人面廣，冬季轉會窗四出借兵，成功引入狼隊射手奇雲杜里、韋斯咸前鋒邁加同曼聯箭頭韋爾堅尼，前兩位巴打上仗對住般尼齊齊建功，即使今戰主力前鋒查理柯士甸要養傷，班波都夠火力同對手死過，一於玩入球大。
禾寧丹芬洛反客為主

再睇兩場荷乙賽事，川迪青年隊主場對禾寧丹，主隊打得幾叻都冇得上荷甲，佢哋啱啱將射手施舒斯查恩借畀榜首多德勒支，戰鬥力大減，唔夠禾寧丹揪！阿積士青年隊主場鬥芬洛情況一樣，主隊打荷乙只為練兵，反觀芬洛歇冬後三連勝，鬥心贏晒，有力反客為主。