何澤堯復出日日發

猪拉多纳

　　何澤堯明晚刑滿復出，小伙子重新披甲，八場賽事竟坐騎爆棚，於今時今日而言，馬匹帥印盡由幾個外籍大師傅壟斷，本地小將喜獲支持，誠如久旱逢甘露，盡顯人間有情一面。尤其見諸師父方嘉柏，徒弟仔餓馬多時，所謂手停口停，適逢「出冊」大日子，自然要撚好幾隻靚馬替其洗塵。

　　第五場「日日發」的心意最是明顯，久沉馬季內屢戰無功，上仗配郭能爆入大冷T腳，人馬合作創佳績，幕後必然飲得杯落。惟劇情發展出人意表，今場郭能改騎「足智多謀」，是他主動索騎抑或無可選擇？答案要局內人才知。但回說「日日發」，昔日配堯仔曾交出三贏三位，合拍程度遠勝郭能，何況谷草1650米是其首本途程，今仗人強、馬勇兼路合，堯仔可一洗頹氣。

　　另一匹第二場「手機皇」，在港唯一頭馬於谷草1800米建功，現評35分，較勝時低4分，起用堯仔再獲減兩磅，計客觀條件着數到暈。話時話，近日天氣潮濕，更預期周三有雨，「手機皇」上季贏馬正是雨中作賽！今仗得地利配合，本身評分又創新低，應該反彈了。