摩納哥讓球主勝冇蘭度

猪拉多纳

今晚法甲上演一場獨腳戲，由「暴發戶」摩納哥將主場出戰蘭斯，摩軍雖有王牌射手法卡奧長抖，好彩佢嘅哥倫比亞同胞占士洛迪古斯愈踢愈Sharp醒，誓要報番今季盃賽被蘭斯淘汰嘅一箭之仇，讓球主勝捧得過。

（TVB 301周六凌晨3時30分直播）

摩納哥雖有哥倫比亞前鋒法卡奧要養傷，而新加盟嘅瀟灑哥貝碧托夫亦磨合需時，但小將占士洛迪古斯近期演出勁有大將之風，唔單止與摩天奴承擔組織進攻重任，連入波重責都要孭埋，上仗對巴斯蒂亞嘅賽事就由佢包辦晒兩個士哥，包括一個靚絕罰球，真係弗到漏油。
蘭斯連拚後現疲態

蘭斯出名硬淨，不過連撼馬賽、里爾、里昂、波爾多等勁旅後，難免有疲態，況且佢哋上年10月尾喺法聯盃一球氣走摩納哥，令呢支「暴發戶」錯失捧盃機會，谷埋成肚火，今仗勢必搵蘭斯出氣，讓球主勝好路。