黑貓有力反咬疲兵

猪拉多纳

啱啱喺歐聯輸畀拜仁慕尼黑嘅阿仙奴今晚返主場迎戰「黑貓」新特蘭，兵工廠近期三線作戰，一眾槍手搏到有氣冇碇抖。新特蘭為搶分護級目標鮮明，主帥普耶又輪換得宜，面對疲「兵」有力偷雞，波童冷敲讓球客勝。

（now 622周六晚11時直播）
魔鬼賽程　阿仙奴謝晒

阿仙奴踏入二月成績一般，兩鬥利物浦、硬撼曼聯及拜仁只得一勝一和兩負，周中歐聯16強踢十個輸畀拜仁更加元氣大傷。兵工廠板櫈深度唔算強，經過呢段魔鬼賽程班球員已經謝謝地，當中尤以周中射失十二碼嘅中場靈魂奧斯爾跌Watt最明顯，直接影響球隊進攻力。

新特蘭雖然都係三線出擊，但明顯聯賽護級先係佢哋首要目標，所以領隊普耶上周足總盃專登收起文路尼、寄誠庸、阿當莊臣、艾迪杜里等主力，讓球員有足夠時間休息，淨計體力已經贏晒一周雙賽嘅阿仙奴。加上「黑貓」近年作客酋長球場表現不落下風，對上五次有三次搶分成功，今仗隨時反咬阿仙奴一啖，受讓可捧。