北京+1發圍折箭

猪拉多纳

F組爆中日大戰

亞冠盃分組賽正式開打，F組由日職王者廣島三箭主場對中超大軍FC北京（北京國安），三箭上屆亞冠盃分組賽包尾出局，教頭森保一自知兵力有限，唔會太大想頭。反觀北京搵埋名帥文沙奴領軍，有心發圍，有得受讓下，2.05倍讓球客勝咪走寶！

（now 671周二晚6時直播）

蘇豪上年去過廣島三箭探班，教頭森保一話球會資源有限，唔似中超列強可狂掃球星，大軍本季新戰力主要來自青年軍，小將野津田岳人同淺野拓磨上場喺日超盃有士哥，總算交到貨，但打亞冠盃經驗好重要，佢哋上屆分組賽六戰不勝包尾出局，其中兩戰北京一和一負，證明隊波要挑戰列強仲需要時間，新季冇埋門神西川周作，班波未必即時會有好大進步，就算主場出擊都唔睇好。
名帥文沙奴領軍夠信心

FC北京新帥文沙奴接手唔夠十日，話明會邊教邊調整，但有呢位名帥領軍真係信心保證，兩大外援祖菲古朗同彼德烏達卡於外圍賽亦展現級數，由FC首爾來投嘅中場河大成今仗有望披甲，呢班兵堅有卡士，作客面對三箭不落下風，預期可保不敗。